استشارة من : Mariuooma Abu Said
مسا الخير دكتور
بنتي عمرها خمس سنين
بشهر واحد اولة السنة صابتها حرارة عالية وصلت فوق الاربعين كانت داخلية وما انتبهنالها الا بالليل طبعا اخدناها عند الدكتور اعطاها مضاد وخافض حرارة وعملنالها تحاليل يومها طلع شوية التهابات بالبول والهيموجلوبين 12.5
بس من يومها البنت صارت تصحى بالليل بتهلوس يعني بتعيط ودموع وصراخ
وبتحاول تحكي مابتعرف وما بتعرف مين هيي لبعد كم دقيقة
باخدها على الحمام بتعمل بول وبرجع بنيمها بتنام بس لما تصحى الصبح ما بتتذكر اي شي ونشاطها طبيعي
تقريبا كل شهر بصير معها هيك اكم يوم متواصله وبعدين بترجع طبيعي
اخدها زوجي عند دكتور محمود خريشة الاخصائي النفسي سالها كم سؤال وقالنا انها طبيعية بس لو استمرت بدنا نعطيها منوم تنام طول الليل انا ما وافقت قلت من هلا بدي اعطيها مهدئات
هلا الحالة بعدها مستمرة تقريبا الها اسبوع بعد ما تنام بنص ساعه لساعه بتصحى وبكون كل شعرها وجسمها عرق يعني بركة ماي وبتصى وبتعيط وامبارح صابتها رعشة برجليها وبعد عشر دقايق لعرفت مين هيي ومين انا
دكتور جد انا ارتعبت منها امبارح لانها زادت وجد دكتور انا خايفة
هلا اذا فيه داعي بجيبها عندك نحن من سكان طولكرم بس زوجي مداوم برام الله
بليز انصحني دكتور شو اعمل ؟؟
لو فيه داعي اني اتصل عليك بس ابعتلي مسج وبتصل اذا فيه شي تاني بدك تعرفه
سوري طولت عليك
ام محمد والدة ميسم جابر

عيادة الاطفال

 سلامات اختنا الطفلة تعاني من كوابيس ولا مشكلة في اعطائها المنوم وهو بسيط يمكن اعطاؤه لفترة وما رح يحل المشكلة بس بخفف منها ولازم تحاولي تجنبي الطفلة اي توتر نفسي واهم شي تجنب التخويف لها والضغط عليها وبهدلتها وشيء مهم ممنوع تتفرج عالتلفزيون او الكمبيوتر الاساعتين باليوم ومعك تكون وتختاريلها برامج هادئة بدون عنف او تخويف متل برامج البنات على ام بي سي3 وحاولي خليها تفرغ بالالعاب الرياضية البسيطة متل الرقص او السباحة واذا بتنام لحالها جربي نيميها بحضنك ووقت النوم 9 مساء لازم توفريلها الجو المناسب من العتمة والهدوء حتى لو بتنيمي كلالبيت بعد العشا وان شالله بتتحسن

د.أكرم سعاده